Plastado na ang preparasyon sang Barangay Council sang Barangay Cagay ,Roxas City para sa pagkomemorar sang Undas 2026.
Sa interview sang Bombo Radyo Roxas kay Punong Barangay Arturo Aragon, iya ginpahayag nga may yara na sang nagkalain-lain nga preparasyon agud masiguro ang seguridad sang mga pumuluyo kag mga bisita nga magatambong sa sementeryo sa tion sang Undas.
Suno kay Aragon, nagpatigayon man ini sang pagsinapol sa mga barangay tanod agud mahatagan sang nagakaigo nga responsibilidad sa pagmintinar sang seguridad sa palibot sang sementeryo.
Kabahin man sa ila preparasyon ang pagbutang sang mga tarpaulin nga may pahibalo nga “No Parking” kag “No Loading and Unloading” agud malikawan ang paggutok sang trapiko, ilabi na sa atubang sang sementeryo.
Nagpanawagan man ang natungdan sang kooperasyon sang tanan para mangin malinong kag matawhay ang pagkomemorar sa mga himata nga nagtaliwan na.
