Handa liwat nga magtestigo si Department of Transportation Secretary Vince Dizon sa masunod nga proceedings may kaangtanan sa flood control scandal, lakip na ang kaso nga ginapangatubang ni former Ako Bicol Party-list Representative Zaldy Co.
Suno kay Dizon, sundon niya kun ano man ang kinahanglan sang Office of the Ombudsman agud mapadayon ang mga kaso nga ginpasaka batok sa mga personalidad nga involved sa ginaalegar maanomaliya sa flood control projects.
Matandaan nga ulihi nga nagtestigo si Dizon sang Setyembre 23 sa kaso sang graft ni Co may kaangtanan sa ginaalegar iregularidad sa proyekto nga nagabalor sang P289.4 million sa Naujan, Oriental Mindoro.
Personal man nga gin-usisa ni Dizon ang nasambit nga proyekto kag ginpahayag nga substandard ang gingamit nga sheet piles.
