Ginsiguro sang Barangay Council sang Barangay Dayao, Roxas City, nga aksyunan ang liwat nga pagbalik sang ilegal nga pagkarera sang motorsiklo sa Circumferential Road sa nasambit nga barangay.
Sa interview sang Bombo Radyo kay Punong Barangay Wennie Batuampo, iya ginpahayag nga madugay na nila nga ginabantayan ang nasambit nga aktibidad kasunod sang mga reklamo sang mga residente sa lugar.
Suno kay Batuampo, may pila na ka residente nga nagreklamo bangud sa sobra nga kagahod sang mga motorsiklo, ilabi na kon gab-i, nga nagadisturbo sa ila pagpahuway kag pagtulog.
Nahibaluan nga sang Oktubre 15, pasado alas 7:00 sang gab-i, natigayon nga maabtan kag madakpan sang mga Barangay Peacekeeping Action Team (BPAT) ang duha sa kapin lima ka mga nagapatigayon sang ilegal nga pagkarera sa Circumferential Road, halin sa Barangay Dayao pakadto sa Barangay Cagay.
Sa subong, ginpabakod pa sang mga BPAT ang ila presensya kag pag-roving sa lugar agud mapunggan ang posible nga pagbalik sang ilegal nga pagkarera sang motorsiklo kag masiguro ang kalinong kag kaluwasan sang mga residente kag iban pa nga nagagamit sang dalan.
