Ginasiguro sang City Environment and Natural Resources Office (CENRO) ang padayon nga pagpaninlo sa mga basura nga nabilin sa nagkalain-lain nga sementeryo sa Roxas City kasunod sang pistay minatay.
Sa interview sang Bombo Radyo kay Joel Daria, head sang CENRO, iya ginpahayag nga duha ka garbage truck ang gin-assign sa Banica Public Cemetery samtang isa naman ka truck ang ginbutang sa Cagay Public Cemetery agud mangolekta sang mga basura.
Suno kay Daria, kalabanan sa mga basura nga ila nakolekta amo ang mga plastic bottle, styrofoam kag iban pa nga basura nga nabilin sang mga nagabisita sa sementeryo.
Dugang pa sini, nagdeploy ang CENRO sang kabug-osan nga 10 ka garbage truck sa nagkalain-lain nga bahin sang syudad agud masiguro ang padayon nga pagkolekta sang basura kag pagmintinar sang katinlo sa mga sementeryo kag palibot sini.
