Ginatudlo nga isa sa mga posible nga rason sang pagdamo sang mga kaso sang premature birth ukon mga lapsag nga natawo antes sang ila pagbun-ag ang masobra nga init sang panahon sa Pilipinas sang 2024.
Suno sa bag-o nga pagtuon sang Zero Carbon Analytics, isa ka international research group nga nagatuon sa climate change, may dugang nga 585 ka kaso sang premature birth sa tunga sang 15 ka adlaw nga sobra nga kainit sang panahon.
May kaangtanan ini sa nagluntad nga malawig nga dry spell sa pungsod bangud sa El Niño phenomenon.
Sa resulta sang pagtuon, ang Cagayan Valley ang isa sa mga lugar nga may daku nga risgo, bangud ang probinsya sang Cagayan posible makabaton sang dugang nga 4.01 degrees Celsius nga temperatura kumpara sa normal nga kainit sang panahon.
Samtang, yara man sa ika-pito nga pwesto ang Pilipinas sa Climate Risk Index sang Germanwatch, nga nagapakita sang daku nga epekto sang climate change kag sobra nga kainit sang panahon sa pungsod.
