Ginhimo nga plataporma sang mga estudyante ang pagselebrar sang National Students’ Day agud ipabutyag ang ila panawagan para sa dugang nga pondo sa edukasyon kag ang pagbatikos sa ginapahayag nga ₱17-bilyon nga pondo nga may kaangtanan sa pagbisita ni United States President Donald Trump sa Pilipinas
Sa interview sang Bombo Radyo kay Matt Gonzaga, National Vice President for Visayas sang Anakbayan, iya ginpahayag nga dapat unahon sang gobyerno ang panginahanglan sang mga estudyante, lakip na ang pagpaayo sang mga pasilidad sa eskwelahan, paghatag sang libre kag dekalidad nga edukasyon, kag paghatag sang dugang nga bulig pinansyal sa mga naga-eskwela.
Suno kay Gonzaga, ginakwestyon sang grupo ang prayoridad sang gobyerno sa paggamit sang pondo sang pungsod, bangud para sa ila, mas dapat nga igahin ang mas daku nga pondo sa edukasyon sa baylo nga maggasto sang bilyon-bilyon ka pesos para sa pagbisita sang isa ka foreign leader.
Pahayag , ginalantaw sang Anakbayan nga importante ang pagpakigbahin sang mga estudyante sa mga isyu nga nagahilabot sa ila palaabuton, bangud indi lamang ini selebrasyon kundi kahigayunan man agud ipabati ang ila mga panawagan kag magpahayag sang pagbatok sa mga polisiya nga para sa ila wala nagahatag sang prayoridad sa kaayuhan sang mga Pilipino.
Madumduman nga sa idalom sang Republic Act 11369, gin-deklarar ang Nobyembre 17 kada tuig bilang National Students’ Day agud kilalahon ang importante nga papel sang mga estudyante sa demokrasya kag pagpalambo sang pungsod.
