Patay ang 16 ka mga mamumugon samtang 13 ka iban pa ang napilasan sa nagluntad nga paglupok sa isa ka steel plant sa Izmir province sa western Turkey.
Ginkumpirmar ni Turkey President Recep Tayyip Erdogan ang kadamuon sang mga napatay kasunod sang insidente sang Lunes sa HABAŞ Iron and Steel Plant sa distrito sang Aliaga.
Base sa una nga imbestigasyon, ang paglupok natabo sa tion sang pag-ilis sang furnace sang nahulog ang isa ka overhead crane kag ang mga materyales nag-igo sa isa ka industrial furnace nga nagtuga sang paglupok pagkatapos nga nabali ang linya sang natural gas.
Sa mga pilason, duha ang yara sa kritikal nga kondisyon kag padayon nga ginabulong sa malapit nga mga ospital.
Padayon naman ang search and rescue operations matapos ginreport nga may apat pa ka mamumugon ang ginapatihan na-trap sa idalum sang mga narumpag.
