Magapresentar sa gihapon sang mga testigo ang defense team ni Vice President Sara Duterte agud sabton ang mga palamangkutanon nga wala masabat sa mga nakaligad nga testimonya, partikular sa mga bagay may kaangtanan sa iya Statement of Assets, Liabilities and Net Worth (SALN).
Suno kay Atty. Michael Poa, lakip sa mga luyag mag-athag sang kinalain sang mga impormasyon nga nasaad sa SALN ni Duterte kag sang mga dokumento nga narehistro sa Securities and Exchange Commission (SEC).
Ini matapos gin-usisa ni Senate President kag presiding officer Francis Escudero si defense witness nga si Atty. Suzette Balucanag-Punay angot sa gin-alegar nga puhunan ni Duterte sa branches sang fast-food.
Gin-ako ni Balucanag-Punay nga wala siya nakahibalo kun ngaa nagabaton sang bayad ang bise presidente gikan sa kasubong nga negosyo.
Gin-athag ni Poa nga limitado lang ang ihibalo sang kada witness rason nga may iban pa sila nga ipresentar agud makahatag sang dugang nga impormasyon.
Samtang, kalabanan sa mga tiglawas sang bangko ang indi igapresentar bilang testigo, magluwas lang sa tiglawas sang isa pa ka bangko.
Wala pa ginabuyagyag sang depensa ang identity sang ila iban pa nga mga testigo.
