Posible nga malabawan sang Commission on Elections (COMELEC) ang target sini nga tatlo ka milyon ka bag-o nga rehistrado nga botante para sa 2028 National and Local Elections, kasunod sang mataas nga numero sang mga nagparehistro sa una nga duha ka adlaw sang voters registration.
Suno kay COMELEC Chairman George Erwin Garcia, halos 80,000 na ka aplikasyon ang na-record sa bilog nga pungsod halin sang nagsugod ang registration sang Nobyembre 10.
Mas mataas ini kun ikumparar sa nagligad nga registration period sang Agosto 2025, nga naglab-ot lamang sa 20,000 ang numero sang mga nagparehistro sa una nga duha ka adlaw.
Nalipay man si Garcia sa madamo nga mga pamatan-on, partikular ang nagaedad 17 kag 18 anyos, nga nagpakita sang interes nga makigbahin sa masunod nga eleksyon.
Apang gin-athag ni Garcia nga isa sa mga rason sang malawig nga pila sa pila ka registration sites, pareho sang Luneta Park, amu ang mga estudyante nga nagakinahanglan sang voter certification ukon pamatuod nga rehistrado sila bilang botante, nga isa sa mga requirement sang ila eskwelahan.
Bangud sini, nakig-angut na ang COMELEC sa mga eskwelahan agud pangayuon nga palawigon ang deadline para mahatagan sang bastante nga tion ang mga estudyante nga makaparehistro.
Magapadayon ang voters registration tubtob Hulyo 30, 2027. Target sang COMELEC nga makadugang sang tatlo ka milyon ka botante agud maglab-ot sa 74 milyon ang kabug-usan nga rehistrado nga botante antes ang 2028 elections.
