Nakabatyag sang kalipay ang una nga blood donor sa ginpatigayon nga Dugong Bombo 2026 “A Little Pain, a Life to Gain.”
Sa interview sang Bombo Radyo kay Fire Senior Superintendent Susie Mae Magan, Chief Public Information Unit sang Bureau of Fire Protection (BFP)-Capiz, iya ginpahayag nga daku ang mabulig sang pagdonar sang dugo sa mga tawo nga nagakinahanglan sini, ilabi na sa mga pasyente nga nagakinahanglan sang blood transfusion.
Suno kay Magan, bilang isa ka katapo sang BFP, indi lamang pagresponde sa mga sunog kag iban pa nga emerhensya ang ila responsibilidad, kundi lakip man diri ang pagpakigbahin sa nagkalain-lain nga civic activities nga nagahatag sang benepisyo sa komunidad, kaangay sang bloodletting activity.
Dugang pa sini, nalipay siya nga nangin kabahin sang aktibidad kag nangin instrumento sa pagbulig sa iban paagi sa simple nga pagdonar sang dugo.
Nagalaum man ang natungdan nga mas madamo pa nga indibidwal ang maengganyo nga magdonar sang dugo agud mabuligan ang mga pasyente nga nagakinahanglan sini kag makaluwas sang kabuhi.
