Ginhatagan sang pasidungog sang BAYAN Panay ang tanan nga mga indibidwal kag grupo nga nagpasakop sa protesta nga ginhiwat kadungan sang ika-49 nga ASEAN Summit, partikular sa pagpamatuk sa inisyatibo sang Pax Silica, sa pihak sang pagkadakop sang pila nila ka mga kaupdanan.
Sa interview sang Bombo Radyo kay John Ian Alenciaga, Deputy Secretary General sang BAYAN Panay, ginpasalamatan sini ang mga nagpakita sang kaisog kag determinasyon sa pihak sang posibilidad nga madakpan samtang ginahimo ang ila mga aksyon.
Suno kay Alenciaga, importante para sa publiko nga padayunon ang pagpabutyag sang ila mga reklamo kag pagpamatuk sa mga polisiya nga sa ila pagpati mahimo makaapekto sa soberanya kag interes sang pungsod, lakip na ang isyu sang Pax Silica.
Dugang pa sang natungdan, indi dapat mangin rason ang pagdakop sa pila nila ka mga kaupdanan agud mahadlok ang iban kag mag-untat na sa paghiwat sang protesta kag pagpabutyag sang ila determinasyon.











