-- ADVERTISEMENT --

Preparado na ang Roxas City Police Station sa pagpatuman sang nagkalain-lain nga seguridad agod masiguro ang malinong kag hapsay nga pagsaulog sang Sinadya Festival 2026 sa Siyudad sang Roxas.

Sa interview sang Bombo Radyo kay Police Lieutenant Colonel Rogelio L. Tomagtang Jr., Chief of Police sang Roxas Component City Police Station, iya ginpahayag nga nagpatigayon na sila sang initial meeting upod sa mga katapo sang Incident Management Team sang City Disaster Risk Reduction and Management Office (CDRRMO), lakip na ang nagkalain-lain nga ahensya sang syudad, agod talakayon ang preparasyon para sa selebrasyon.

Suno kay Tomagtang , nakahanda na ang ila security plan nga gin-forward sa Provincial Office para sa approval ni Provincial Director Police Colonel David L. Cachumbo Jr., lakip na ang ila request nga 156 ka augmentation personnel nga magahalin sa nagkalain-lain nga banwa sa probinsya sang Capiz.

Pahayag pa niya, base sa ila initial threat assessment, wala sila sang namonitor nga posible nga pagpamahog sa tion sang Sinadya Festival. Apang, padayon gihapon ang ila pagpanghanda kag pagpatuman sang nagkalain-lain nga seguridad, lakip na ang pagpatigayon sang checkpoints sa tatlo ka strategic locations sa syudad agod mabantayan ang pagsulod kag paggwa sang mga tawo kag salakyan.

Dugang pa sang natungdan, may yara na sila sang inisyal nga schedule sang police deployment para sa mga aktibidad nga magasugod sa Nobyembre 28, kun sa diin 20 ka personnel ang igadeploy para maghatag sang police assistance. Magapatigayon man sila sang dugang nga meeting para sa checking of resources kag final identification sang mga personnel nga magaserbisyo sa nasambit nga selebrasyon.

-- ADVERTISEMENT --