Naghatag sang pahanumdom ang Department of Health (DOH) sa mga dapat himuon agud malikawan ang mga balatian tuga sang tuman nga kainit sa tunga sang nagapadayon nga epekto sang El Niño.
Suno sa ahensya, mas mataas na ang pamahog sang mga balatian nga may kaangtanan sa init kaangay sang heat exhaustion kag heat stroke bangud sa tuman ka humidity kag mataas nga temperatura.
Panugyan sang DOH sa tanan nga regular nga mag-inom sang bastante nga tubig kada adlaw bisan wala nagabatyag sang kauhaw agud mapabilin nga hydrated ang lawas.
Nagpanugyan man ang ahensya nga buhinan ang pag-inom sang caffeine kag high-sugar nga mga ilimnon, subong man sang alcohol, bangud mas madasig ini nga maka-dehydrate sang lawas.
Ginhatagan pagtamod sang DOH nga importante nga mangin extra careful kag preparado ang publiko sa pag-amlig sang ila ikaayong lawas samtang naga-eksperyensya sang tuman nga kainit tuga sang El Niño.











