Nagpangayo ang abogado sang mga biktima sang war on drugs ni anay Presidente Rodrigo Duterte nga hatagan sila sang mas malawig nga tion agud makasabat sa hangyo sang kampo ni Duterte nga i-diskwalipikar si ICC Chief Prosecutor Karim Khan.
Sa apat ka panid nga dokumento nga ginpagwa sang International Criminal Court (ICC) sang Agosto 15, ginpahayag ni Paolina Massidda sang Office of the Public Counsel for Victims (OPCV) nga wala gilayon nila nakuha ang mga dokumento nga ginbasehan sang depensa sa ila reklamo.
Suno sa iya, sang Agosto 11 lang sila ginhatagan sang access sa mga dokumento, lima ka adlaw pagkatapos gin-submit sang depensa ang petisyon sang Agosto 6. Bangud sini, naghingyo siya umpisahan ang pagbilang sang deadline halin sa petsa sang pagbaton nila sang mga dokumento.
Samtang, ginpakilala man sang abogado ni Duterte nga si Atty. Nicholas Kaufman ang pagka-open ni Khan sa pagbuyagyag sang posible nga conflict of interest, apang ginpanindugan gihapon sang kampo ni Duterte nga dapat siya i-diskwalipikar bangud sang iya anay papel bilang abogado sang isa sa mga biktima.
Sa karon, naka-leave si Khan bangud sang lain nga alegasyon sang sexual misconduct.
Nadumduman nga una na man nga naghangyo ang depensa nga i-diskwalipikar ang duha ka hukom sang ICC Pre-Trial Chamber I, apang ini ang ginpanginwala sang korte antes ang natalana nga confirmation of charges hearing sa Setyembre 23, may kaangtanan sa kaso nga crimes against humanity nga ginpasaka batok sa anay presidente, nga subong yara sa prisohan sa The Hague, Netherlands halin pa sang Marso 14.
In an interview with Bombo Francis Biñas & Bombo Sunnie Mae Batencila
