ROXAS CITY – Dalayawon ang adbokasiya sang Bombo Radyo sa pagbulig sa mga nagakinahanglan pinaagi sa Dugong Bombo.
Ini ang ginpahayag sang gobernador sang probinsiya sang mainterview sang Bombo Radyo.
Suno kay Capiz Governor Esteban Evan Nonoy Contreras, dalayawon ang amo nga aktibidad sang Bombo Radyo bangud katuyuan sini nga makasugpon sa kabuhi sang tawo nga nagakinahanglan sang dugo.
Ginpahayag sini nga dako ang iya nga pagpasalamat sa Bombo Radyo bangud sa tuigan nga aktibidad.
Suno kay Contreras nga naga-isa siya sa kawsa nga pag-amlig sa ikaayong lawas sang pumuluyo kag pagbulig sa mga pasyente nga nagakinahanglan.
Magluwas sa Dugong Bombo suno sa gobernador, dalayawon man ang tuig nga Bombo Medico sang Bombo Radyo kun sa diin nagatanyag sang libre nga serbisyo-medikal para sa mga pumuluyo.
Mahibaluan nga nagpadulong gid si Contreras sa venue sang Dugong Bombo 2019 sang Bombo Radyo Roxas sa City Mall Arnaldo Blvd., Roxas City agud mapakita ang iya bug-os nga suporta sa amo nga aktibidad.
