Gin-inagurahan sang Armed Forces of the Philippines (AFP) ang bag-o nga offshore patrol vessel BRP Rajah Sulayman sa Ulsan, South Korea sang Miyerkules, Hunyo 11.
Ang launching ceremony gintambungan nanday AFP chief General Romeo Brawner Jr. kag Hyundai Heavy Industries chief operating officer kag senior executive vice president Joo Won Ho.
Sa isa ka pahayag, ginpahayag sang AFP nga ang kahiwatan nagapakita sang mabaskog nga pag-updanay sa tunga sang Pilipinas kag South Korea sa dugang nga pagpasanyog sang seguridad sa kadagatan kag self-reliant defense capabilities.
Sa iya mensahe, gintudlo ni AFP chief Brawner ang estratehiko nga importansya sang paglansar sang bag-o nga barko ilabi na sa papel sini sa dugang nga pagpasanyog sang depensa sa kadagatan sang Pilipinas.
Si Brawner nagsiling man nga ang bag-o nga barko nagamarka sang bag-o nga kapitulo para sa Philippine Navy, subong man nagapakita sang ila pangako nga labi pa nga mapasanyog ang ila mga ikasarang sa operasyon kag mapasangkad ang ila presensya sa maritime domain.
Suno sa AFP, ang bag-o nga asset ginhingadlan sa maisog nga tumandok nga lider sang Manila nga si Rajah Sulayman nga nagtindog sing malig-on batuk sa mga Espanyol nga manugsalakay.
Ginpahayag man sang AFP nga si Sulayman isa ka moderno nga simbolo sang kalig-on, kaisog kag indi mapunggan nga espiritu sang kahilwayan.
Samtang ang pungsod nagahatag sang pasidungog sa iya nagligad, ginsiling niya nga ang AFP nagapabilin nga komitido sa pagporma sang palaabuton sa diin ang kahilwayan indi lamang ginasaulog kundi ginabantayan man sing maayo.
