Nag-resign na sa iya posisyon si Ako Bicol Partylist Representative Elizaldy “Zaldy” Co bilang katapo sang manubo nga panalgan sang Kongreso kahapon nga adlaw, Setyembre 29, 2025.
Sa iya sulat kay House Speaker Faustino “Bojie” Dy, ginpahayag ni Co nga ang iya desisyon gintunaan sang “seryoso nga mga pamahog” sa kabuhi sang iya pamilya kag sa iya kaugalingon, upod ang ginaalegar nga paglapas sa iya tawhanon nga kinamatarong kag nagakaigo nga proseso.
Ang pag-resign ni Co sa pwesto kadungan sang deadline nga gintalana ni Speaker Dy para makapauli siya sa pungsod matapos ginbawi ang iya travel clearance.
Si Co ang nangin sentro sang kontrobersiya bangud sa ginaalegar maanomaliya nga mga flood control projects sa Mindoro, sa diin ginrekomendar ini para sa kaso sang Independent Commission for Infrastructure (ICI) bangud sa posible nga paglapas sa Anti-Graft and Corrupt Practices Act kag iban pa nga mga kasuguan.
Magluwas sa ethics complaint nga gin-file ni Rep. Toby Tiangco sang Navotas, si Co ang gin-angot sa gina-alegar nga kickbacks halin sa Department of Public Works and Highways (DPWH) projects, bagay nga hugot niya nga ginpanghiwala.
Samtang, ginkumpirmar naman sang Philippine National Police (PNP) ang pag-recall sang lima ka police escorts ni Co matapos nga naghalin ini sa pungsod, bilang kabahin sang standard operating procedure kun wala na sa pungsod ang isa ka opisyal.
Nahibaluan ang pagbiya ni Co nagbilin sang bakante sa pwesto sang Ako Bicol Partylist sa Kongreso, samtang nagapadayon ang imbestigasyon sa mga alegasyon sang korapsyon.
