Roxas City – Aminado ang tagdumalahan sang Capiz Rehabilitation Center (CRC) nga may mga alegasyon nga madata ang iligal nga droga sa sulod sang amu nga pasilidad.
Ini ang isa sa mga rason nga ginpatigayon ang gulpi nga ’Oplan Galugad’ sa mga selda sang CRC, suno kay Mr. Eduardo ‘Boy’ Apaap, Officer-in-charge, sang mainterview sang Bombo Radyo.
Ginpahayag man ni Apaap nga ginkabig nila nga isa ka ‘serious accusation’ ang nabatian niya nga istorya magluwas pa sa nababaton sini nga mensahe may kaangtanan sa paggamit kag transakyon sang iligal nga droga sang mga Person Deprived of Liberty (PDL).
Bangud sini, ginpatawag niya ang mga ‘trusted’ partners sang ila talatapan agud mag-conduct sang amu nga tikang.
Ginsabat man ni Apaap ang alegasyon nga ang ila mga casual employees ang nagadala sang iligal nga droga kag ginaupod si alyas ‘Jeboy’ nga isa ka PDL sa amu nga transakyon.
Suno diri, amu ini ang rason kun ngaman ginpatigayon ang ila operasyon bilang aksyon, apang napamatud-an man nga wala ini sang kamatuoran.
Ginpanginwala man sang nasambit nga OIC ang isa pa ka alegasyon nga may relasyon kag ginagamit ang mga babayi nga inmates sang mga lalaki nga inmates.
Suno diri, wala ini sang kamatuoran kag kun may kaangay nga reklamo man ini nga nababaton, ginahatagan niya ini sang nagakaigo nga aksyon.
Kalakip sa mga matalom kag bawal nga bagay nga nakumpiskar sa nagkalain-lain nga selda amu ang kutsara, tinidor, mataliwis nga punta sang toothbrush, ballpen, kayas, shaver, lighters, gunting, nail cutter kag manicure set.
Nahibaluan nga sa karon, may yara sang 305 ka mga PDLs sa CRC nga ginakabug-osan sang 294 ka mga lalaki kag 11 ka mga babayi.
Sa pihak nga bahin, ginpahayag ni Apaap nga mga fully vaccinated na ang mga PDLs sang CRC.
