Hugot nga ginpanginwala sang kampo ni anay President Rodrigo Duterte ang ginpagwa na listahan sang International Criminal Court (ICC) may kaangtanan sa mga ginapahayag co-perpetrators sa kaso nga crimes against humanity batuk sa iya.
Suno sa lead defense counsel nga si Nicholas Kaufman, “completely lacking in truth” ukon lubos nga wala sang kamatuuran ang mga alegasyon. Ginsiling niya nga madugay na nila nga nahibaluan ang identities sang mga ginpangalanan kag ginkabig ini nga confidential sandig sa mando sang korte.
Sang Biyernes, nagpagwa ang ICC sang mas gamay nga redacted nga bersyon sang Document Containing the Charges kun sa diin ginpangalan ang walo ka ginapahayag nga mga kaupdanan, kalakip sanday Senators Ronald dela Rosa kag Bong Go, subong man ang iban pa nga mga anay matag-as nga opisyal sang pulisya kag gobyerno.
Hugot man nga ginsiling ni Kaufman nga wala sang naka-pending nga arrest warrant batuk sa mga nasambit kag gintawag nga “sensational” kag “politically motivated” ang mga report natuhoy diri. Dugang pa niya, kaangay indi nagakadapat ang pagpagwa sang dugang nga warrant samtang ginahulat pa ang desisyon sang Appeals Chamber sa hurisdiksyon sang kaso.
Samtang, ginpanginwala ni Go ang alegasyon kag ginsiling nga wala siya sang kalibutani ukon authority sa mga isyu nga ginahaboy batok sa iya.
Natalana naman nga suguran sang ICC ang confirmation of charhes hearing sa Pebrero 23, 2026, samtang nakahunong si Duterte sa sulod sang 11 ka bulan.
