ROXAS CITY – Nagpaathag ang alkalde sa banwa sang Mambusao, Capiz nga si Mayor Leodegario Jun Labao, Jr., angut sa ginahaboy nga alegasyon sa iya nga pagbastos sini sa actress-dancer nga si Ella Cruz sa pagbisita sini sa probinsiya.
Ginpanginwala sang alkalde nga gintandog sini ang ‘behind’ ukon alatrasan sang nasambit nga aktres bangud suno sa iya, ‘kiss’ gid lamang ang iya ginpangayo kay Ella nga ginpahanugutan man sang aktres.
Gin-athag pa sini nga wala sang halo nga malisya ang iya nangin aktwasyon sa aktres rason nga mangin siya ang nakibot man sa nangin Instagram post sini.
Suno pa kay Labao nga si actress-turned-politician Alma Moreno ang mga type sini nga artista kag indi isa ka ‘Ella Cruz’.
Matandaan nga nangin daku nga palamangkutanon sa mga netizens ilabi na sa mga Capizeño ang post sang actress-dancer kasunod sang iya pagbisita sa probinsiya sa diin gingamit pa sini ang hashtag nga #WorstExperienceEver.
Nahibaluan nga nagbisita ang aktres sa banwa sang Mambusao kaupod ang teen star nga si Gab Lagman para sa Talent Night sang Mr. and Ms. Inilusan 2018.
