ROXAS CITY – Indi mag-atras si Mambusao Mayor Leodegario ‘’Jun’’ Labao Jr., sa iya plano nga magpadalagan bilang president sang League of Municipalities of the Philippines (LMP) Capiz chapter sa masunod nga bulan sang Hulyo.
Sa exclusive interview sang Bombo Radyo kay Mayor Labao Jr,. ginpahayag sini nga wala ini nabalaka sa ginbuy-an nga pahayag sang mangin kasumpong nga si President Roxas Mayor Receliste ‘’Tanoy’’ Escolin nga suportado ini ni Governor elect Esteban ‘‘Nonoy’’ Contreras, bangud indi man ang gobernador ang magaboto, kundi mga alkalde sa kabanwahanan.
Suno kay Labao nga sa pihak nga wala sang may nagasuporta sa iya nga matag-as nga opisyal sang probinsiya, apang gina-endorso naman ini sang 95-98 porsyento nga mga alkalde sa premier kag segundo distrito sang Capiz, gani kumpyansa na ini sang iya nga kadalag-an.
Ginkumpirma man ni Labao nga personal sini nga gintawagan si Escolin kag ginpangabay nga ipaiway na lamang sini ang iya plano nga pagpadalagan sa LMP Capiz chapter, apang wala nagpasugot ang alkalde sang President Roxas.
Bangud diri ginapanan-aw ni Labao nga mangin maayo ang eleksyon sa LMP Capiz chapter bangud sa ila partisipasyon ni Escolin.
Samtang ginkadlawan lamang sini ang ginapabugal ni Escolin nga pananglitan ini ang magdaug bilang presidente sang LMP Capiz chapter buligan sini nga mapasadya ang LGU nga magaselebrar sang kapistahan pinaagi sa pagdala sang mga artista.
Gintawag man ni Labao nga mga arikutoy lamang nga mga artista ang sarang madala ni Escolin sa tagsa ka magpatigayon ini sang event, bangud ini lamang ang iya masarangan.
