ROXAS CITY -Ginpasakaan sang panumbongon ni President Roxas, Mayor Receliste Tanoy Escolin ang Sangguniang Kabataan President kag iloy sini matapos nga ginpaguba ang porsyon sang ginpatindog nga Public Market sa nasambit nga banwa.
Sa interview sang Bombo Radyo kay Mayor Escolin nga Maliscious Mischief kag Resistance And Disobedience upon Person in Authority and his Agents ang ginpasaka nga panumbongon sa Provincial Prosecutors Office sang alkalde batuk kay SK President Ervin Degala, iloy sini nga si Yvette Degala sang Barangay Hanglid, Ariel Torevilla sang Barangay Culilang kag Rodel Panganiban sang Barangay Vizcaya sang nasambit nga banwa.
Ginpahayag ni Escolin nga nadakpan sini sa akto ang mga nasambit nga persona nga ginaguba ang Camarin Type Wall sang merkado.
Gindugang pa ni Escolin nga ginpasaway sini ang nasambit nga mga persona nga untaton ang nasambit nga pagpang-guba apang sa baylo nga magpati, nagpakatig-a ang mga ini kag ginhangkat pa ang nasambit nga alkalde.
Ginpanindugan ni Escolin nga wala sang koordinasyon sa iya nga talatapan ang ginhimo sang pamilya Degala.
Bangud ginpanag-iyahan sang banwa ang nasambit nga merkado, nagapati si Escolin nga may yara sang salabton ang pamilya Degala sa pag guba sang propedad sa munisipiyo.
Samtang, kapin sa P30,000 ang gintuga nga kasamaran sa naguba nga mga hollow blocks sa nasambit nga merkado.
Nagapabilin naman nga at-large ang mag-iloy nga Degala samtang gin-aresto naman si Torevilla kag si Panganiban.
