ROXAS CITY -Nagapati ang anak sang 68-anyos nga tigulang nga wala sang “foul play” ang kamatayon sang iya amay matapos nga nasapwan ini nga isa na ka mayami nga bangkay sa iya ginatiniran nga payag sa Sitio Arcabalo, Barangay Bolo, Roxas City.
Base sa pagpangusisa sang Bombo Radyo sa anak sini nga si Lito Borja, ginkatingala na lamang sang apo ni Celso Borja Sr., nga nag-iwik ang mga hinuptan sini nga mga baboy.
Sa pagtsekyar sang apo sa payag sang iya lolo, nasapwan na lamang sini ang iya nga lolo nga wala na sang kabuhi kag nagahigda na sa katre nga may dugo kag nagabula ang bibig.
Nagapati naman si Lito Borja nga wala sang foulplay ang kamatayon sang iya amay.
Magluwas diri, nagapati man si Punong Barangay Siolly Andrade nga wala sang foul play ang kamatayon ni Borja.
Suno kay Andrade posible nga gin-atake sang wala matumod nga balatian si Borja kag wala sang indibidwal nga nagpatay sa iya bangud mabuot kag wala man ini sang kontra sa ila barangay.
