Nagalaum ang Gilas Pilipinas nga tugutan ang hirit nila nga kilalahon bilang local player si Angelo Kouame.
Mahibaluan nga ang 6-foot-11 center ang nag-abot sa pungsod halin sa Cote d’Ivoire sadtong 2016 kag nag-eskwela sa Multiple Intelligence Internatioanl School sa Quezon City kun sa diin nakakuha ini sang diploma sa high school sadtong Mayo 2018.
Sa edad nga 18 nagsaylo ini sa Ateneo nga nangin una nga foreign student athlete nga nagdaog sang UAAP Rookie of the Year.
Tuig 2021 sang gawaran sang Kongreso ang 27-anyos nga si Kouame sang Filipino Citizenship para makahampang sa Gilas Pilipinas sadtong panahon ni coach Tab Baldwin antes nangin kabahin sang history-making sang makakuha sang gold medal ang Gilas sa Asian Games sa idalom na ni Tim Cone.
Sa tion nga maaprubahan sang FIBA ang exemption kay Kouame, mangin daku nga liyabe ini sa Gilas ilabi na kag indi makahampang si Kai Sotto bangud sa injury sa tuhod sini.
