ROXAS CITY – Ginlapas sang driver kag mga helpers sang angkar-angkar nga traysikol, ang section 77 sang Presidential Decree 705 ukon ang iligal nga pagtransport sang forest products nga wala sang nagakaigo nga dokumento, matapos nga nadakpan ang amu nga salakyan sa checkpoint sang mga kapulisan, sa national highway sang Ilawod, banwa sang Panitan.
Ang angkar-angkar nga traysikol ang ginamaneho sang wala na ginhingadlan nga driver nga residente sang Sitio Pinaypayan, Brgy. Bolo, Roxas City, kaupod ang duha sini ka mga timbang nga residente man sang nasambit nga barangay.
Narekober sa ila paghinakop ang 17 kabilog ukon 193.33 board feet sang Gemilina lumber nga may balor nga P6,766.55.
Wala sang may napresentar nga dokumento sa pagtransport, ang nagkaladakpan rason nga ginkustodiya ang mga ini sa Panitan Municipal Police Station, para sa nagakaigo nga disposisyon.
Samtang, ang mga ginkumpiskar nga mga kahoy ang yara sa kustodiya sang Municipal Environment and Natural Resources Office (MENRO) Panitan.
Nahibaluan nga ginapanag-iyahan sang taga-Barangay Cogon, Panitan, Capiz ang nasambit nga mga kahoy.
