Luwas nga nakapauli sa pungsod ang anum ka mga Overseas Filipino Workers (OFWs) nagikan sa Iran subong aga sang Sabado, Hunyo 28, 2025 suno sa Department of Migrant Workers (DMW). Ang ila nga repatriation ginpatigayon sa tunga sang nagapadayon nga tensyon sang Iran kag Israel.
Lima sa mga OFW nagatrabaho bilang shrimp hatchery technicians sa Iran, samtang ang isa nagatrabaho bilang domestic worker sa Dubai nga gin-upadn ang iya nga amo bilang turista. Nag-abot sila sa Ninoy Aquino International Airport (NAIA) Terminal 3 sakay sang Emirates Airlines.
Ginsugata ang mga ini sang mga opisyales nagikan sa Department of Migrant Workers (DMW), Overseas Workers Welfare Administration (OWWA), kag Department of Foreign Affairs (DFA), kalakip sanday OWWA Administrator Patricia Yvonne Caunan, DFA Undersecretary Eduardo de Vega, kag DMW Assistant Secretary Venecio Legaspi.
Kaupod man sa nagsugata ang MIA Medical Team kag tiglawas nagikan sa Department of Social Welfare and Development (DSWD) agud siguruhon ang ila nga kaluwasan kag ikaayong lawas. Nagpanagtag ang mga ahensya nga ini sang pagkaon, serbisyo medikal, kag bulig pinansyal sa mga gin-repatriate nga OFWs.
Pahayag pa sang DMW, nangin madinalag-on ang repatriation sa bulig sang Philippine Embassy sa Tehran sa pagpanguna ni Ambassador Roberto Manalo kag sa pakigkoordinar sang OWWA. Padayon ang pagbantay sang gobyerno sa sitwasyon sang mga Pinoy nga yara sa iban nga pungsod labi na sa mga lugar nga may kinagamo.
