Masami nga ginareklamo sa Barangay ang isa ka apartment nga ginsalakay sang Philippine Drug Enforcement Agency – Capiz sa Saint Francis Subdivision, Brgy. Tanque, Roxas City.
Sa interview sang Bombo Radyo kay Kagawad Dodoy Daliva, makapila na gin-report sa ila barangay nga may nagaguwa-pasulod nga indi kilala nga mga tawo nga naka-motor kag salakyan sa nasambit nga lugar ilabi na kun kagab-ihon.
Magluwas pa diri, suno kay Daliva indi makatulog ang mga kalapit nga balay sang apartment bangud sa gahod kun gab-i kag suno pa sa nag-report sa ila barangay nga may mga persona kun kaisa nga makit-an nga nagataklos sang armas kag makaduluda ang mga ginahulag.
Matandaan nga narekober sang PDEA-Capiz ang 16 tanan ka sachet sang ginapatihan shabu sa amo nga apartment nga ginhimo drug den matapos ang ginkasa nga drug buybust operation.
Naaresto ang tatlo ka persona nga sanday Gilbert Ablero Fadrique, Achilles Baltazar Dilla kag May Casugbo Cordovero.
Naglab-ot naman sa masobra P400,000.00 ang balor sang iligal nga droga ang nakumpiskar sa mga nagkaladakpan kalakip ang P1,000.00 buybust money, kilohan kag drug paraphernalias.
Magapangatubang sang kaso nga paglapas Republic Act 9165 ukon Comprehensive Dangerous Drugs Act of 2002 ang nasambit nga mga arestado.
Sa karon nagapabilin ang mga ini sa kustodiya sang mga otoridad para sa nagakaigo nga disposisyon.
