TAPAZ, CAPIZ – Gintupok sang kalayo ang apat tanan ka puluy-an nga human sa light materials matapos ang nagluntad nga sunog sa Sitio Sibaguan, Brgy. Initan, Tapaz, Capiz.
Ginapanag-iyahan ang amo nga mga puluy-an nanday Corazon Salas kag mga himata sini nga lunsay mga residente sa nasambit nga lugar.
Sa impormasyon nga nakuha sang Bombo Radyo sa Tapaz Fire Station ginpahayag nga takna alas 12:20 sang kaaganhon may nagpadulong sa ila istasyon nga may nagluntad nga sunog sa lugar.
Gilayon man nila ini nga ginrespondihan kag gindeklarar nga fire out takna alas 12:48 kagaina sang aga.
Maswerte naman nga wala sang nabalhag nga kaswalidad sa amu nga insidente.
Samtang yara sa ginabulubanta P15,000 ang nangin halit sang amu nga sunog.
Sa karon nagapadayon ang imbestigasyon sang Tapaz BFP agud matumod ang gintunaan sang sunog.
