ROXAS CITY – Narekober sang mga katapo sang Philippine Army 47th Infantry Battalion kag 604th Mobile Company sang Regional Mobile Force Battalion 6 ang pila ka mga armas-luthang kag medical supplies nga nakalubong sa duta sa Sitio Makilo, Barangay Camansi,. Kabankalan City.
Sa interview sang Bombo Radyo kay LtCol. J-Jay Javines tagpamaba sang 3ID Philippine Army, suno diri natigayon nga marekober ang mga arms cache matapos makabaton sang tip ang mga otoridad nagikan sa isa ka concerned citizen.
Nakutkot sa lugar ang 1 ka caliber .357 Magnum revolver, 1 ka homemade 12-gauge shotgun nga may tatlo ka bala, fragmentation grenade, improvised explosive devices, 205 ammunition sang M16 assault rifle, nagkalain-lain nga medical supplies kag mga dokumento.
Suno kay Javines, indi na bag-o sa ila ang natabo bangud masami ini nga nagakahinabo ilabi na sa mga lugar nga nagaserbi mobility corridor sang mga rebelde nga grupo.
Nagapati si Javines nga ginlubong sang grupo ang ila mga kagamitan sa panahon nga na-corner na ang mga ini sang mga suldado kag nagapakuno-kuno na lang nga sibilyan ukon nagaserbi ngaback-up sang armado nga grupo pananglitan may magluntad nga engkwentro.
