TAPAZ, CAPIZ – Natukiban sang 12th Infantry Battalion sang Philippine Army kag sang 62nd Special Action Company sang 6th Special Action Battalion sang Philippine National Police ang isa ka abandonado nga hideout sang ginapatihan New People’s Army kag arms cache samtang nagapatigayon sang combat operations ang otoridad sa Sitio Naatip, Barangay Lahug, Tapaz, Capiz.
Suno kay Major General Michael Samson, commander sang 3rd Infantry (Spearhead) Division, nagapamatuod lamang nga nagahina na ang mga nabilin nga Communist Terrorist Group sa Tapaz.
Ginapanawagan sang natungdan ang publiko nga ipabilin nga mangin vigilant kag suportahan ang mga pagpaninguha sang gobyerno nga makatukod sang mas safe kag mas malinong nga komunidad para sa future generations.
Sa ginpatigayon nga Army and Police operation, nakadiskubre ang tropa sang gobyerno sang temporary NPA ukon CTG encampment nga may mga gamit kaangay sang tents, Communist Party of the Philippines kag Bagong Hukbong Bayan flags, backpacks, duyan, power bank, medical paraphernalia, kag iban pa nga mga pagkabutang.
Nakita man ang arms cache — 200 meters nagikan sa hideout, nga may M16 rifle, long magazine, kag live ammunition.
