ROXAS CITY – Palaligban pa sa karon sa asawa sang traysikol driver nga ginluthang-patay kun ano ang motibo sang riding-in-tandem agud mahimo ang krimen sa atubang sang DepEd – Division Office Barangay Banica syudad sang Roxas.
Ginkilala ang biktima kay Nestor de Andres, residente sang Barangay San Jose sining syudad.
Sa pagpakig-angut sang Bombo Radyo kay Rhea, asawa sang biktima wala ini nagalaum nga subong nga adlaw ang katapusan nga tion nga makaupod sini ang iya bana.
Ba-se sa panaysayon ni Rhea, sugaton kuntani nila ang ila apo sa Brgy. Tanque sang may nabatian ini nga lupok.
Nagdumdum sila nga ang goma sang ila tricycle ang naglupok, apang ginkakibot na lamang sini sang nakita nga nag-uy-uy ang iya bana kag may igo na sa likod.
Ginapanindugan sang ginang nga wala man sang nangin kaaway ang iya bana rason nga dako nga palamangkutanon ang pagluthang-patay sa iya.
Matandaan nga samtang naga biyahe ang mag-asawa hinali na lamang may nag-overtake nga motorsiklo sa ila kasunod ang pagluthang sang makaduha ka beses sa biktima nga gintunaan sang iya kamatayon.
Narekober sa lugar nga ginluntaran sang krimen ang duha ka basiyo sang bala.
Samtang madasig nga nagpalagyo ang wala makilala nga mga suspek nga nagasuksok sang bonnet.
Sa karon, nagapadayon ang imbestigasyon sang kapulisan angut sa insidente.
