DUMALAG, CAPIZ – Asthma ang ginatudlo rason sa nangin kamatayon sang isa ka Senior Citizen nga nasapwan patay sa iya puluy-an sa banwa sang Dumalag, Capiz.
Ang biktima amo si alyas “Juan”, 65-anyos kag residente sang Brgy. Concepcion, Dumalag, Capiz.
Sa interview sang Bombo Radyo kay Police Lieutenant Liberato Cagampang Jr.,Deputy Chief of Police kag Public Information Officer sang Dumalag Municipal Police Station, iya ginpahayag nga nagpadulong ang bata sang biktima sa istasyon agud i-report nga nakit-an sini ang iya amay sa sulod sang ila puluy-an nga wala na sang kabuhi.
Suno kay Cagampang, pag-abot sa lugar, nasapwan ang bangkay sang biktima nga nagahigda kag yara na sa advanced state of decomposition.
Pahayag pa niya, ginpakigbahin man sang asawa sang biktima nga madugay na ini nga may ginasupreher nga balatian nga possible gintunaan sang iya kamatayon.
Samtang, nagapati naman ang pamilya nga wala sang foul play sa kamatayon sang ila nga himata.
Sa subong, yara na sa isa ka punerarya ang bangkay sang biktima kag ginapreparar na nga maipauli sa ila nga puluy-an.
INTERVIEWED BY: BOMBO ROADNIE DALANON
