Ginalauman nga magabukas sa madamo nga trabaho, makapanubo sang presyo, kag makapasangkad sang oportunidad para sa mga Pilipino ang bag-o nga free trade agreement sa tunga sang Pilipinas kag United Arab Emirates (UAE) nga ginpirmahan ni President Ferdinand R. Marcos Jr. sang Enero 13, 2026 sa Abu Dhabi.
Ini ang ginhatagan pagtamod ni Executive Secretary Ralph Recto.
Suno kay Recto, ang Comprehensive Economic Partnership Agreement (CEPA) ang pinakauna nga free trade deal sang Pilipinas sa isa ka pungsod sa Middle East.
Tuyo sini nga mapanubo ang taripa, mapasangkad ang pag-access sa merkado para sa mga balaklon kag serbisyo, kag ma-engganyo ang pamuhunan, nga makabenepisyo sa mga mangunguma, mamumugon, propesyonal, kag MSMEs.
Ang mga Pilipino nga nagatrabaho sa healthcare, IT, construction, tourism, kag iban pa nga sektor ang makabenepisyo man sa mas bukas nga access sa United Arab Emirates.
Kadungan sini, ginpirmahan man ang defence cooperation agreement nga magapabaskog sang trade kag security ties sa tunga sang duha ka pungsod.
