ROXAS CITY – Ginpatuman na sang Philippine Health Insurance Corporation (PhilHealth) ang bag-o nila nga programa nga Text BPN ukon Benefit Payment Notice sa mga miyembro sang ahensiya.
Ginpahayag ni Mrs. Mary Jane Valderama Amigo, social officer sang PhilHealth-Capiz branch nga pinaagi sini ang mga miyembro nga may pasyente nga nag-avail sang benepisyo ang makabaton sang text gikan sa PhilHealth nga naga-imporma nga nakabayad na ang ahensiya sa ospital.
Ginklaro man ni Amigo kun ang kantidad nga napagkit sa Text BPN ang nagasantu sa billing statement sang ospital, indi na kinahanglan nga magpadulong sa talatapan sang PhilHealth ang folks sang pasyente bangud nagapatimaan lamang ini nga ensakto kag wala sang kulang ukon dapat nga i-refund sa miyembro.
Apang kun wala mabuhin ang bilog nga package nga kabahin sang benepisyo sang miyembro kag sila ang nagbakal sang mga bulong kag nagbayad sang laboratory fees, mahimo sila nga magpakig-angut sa ospital kag dalhon ang tanan nga mga resibo, bilang pamatood nga wala nila ma-avail ang kabug-usan nga package nga kalakip sa benepisyo sang miyembro sang PhilHealth.
Liwat ginpahanumdum ni Amigo ang mga miyembro, kun ila na-avail ang bilog nga package kag nabuhin ini sa ila bill sa ospital, apisar nga makabaton sila sang text halin sa Philhealth, i-disregard na lamang nila ini.
