ROXAS CITY, CAPIZ- Nagapabilin nga sa gihapon madamo ang bumalakal sang bugas sa merkado publiko Teodoro Arcenas Trade Center, Roxas City sa pihak sang nagapadayon nga tig-alani.
Sa interview sang Bombo Radyo kay Mr. Edilberto Cambe, Presidente sang Rice Retailers Association, ginpahayag nga apisar nagapadyon ang tig-alani, madamo sa gihapon ang nagabakal sang bugas sa merkado.
Dugang pa sini, pareho man sa gihapon ang presyuhanay sang bugas nga ginabaligya sa merkado kag suno sa iya wala sang pagtaas.
Yara sa P40 tubtob P90 ang presyuhanay sang bugas nakadepende sa klase sini.
Samtang, sa pihak nga bahin, gin-athag ni Cambe nga apisar may yara sang programa ang gobyerno nga ‘Benteng Bigas Meron Na’ program, gin-athag sini nga indi ini mahimo nga mabakal sa merkado publikon apang mabakal ini depende sa kun diin ini ipahamtang sang mga nagkalatungdan.
Pahayag pa sini, apisar may yara sang iban nga nagasiling nga maapektuhan sang gamay ang ila nga baligya sat ion nga mag-abot na ang amo nga programa sa syudad sang Roxas, ginpanumdom nalang sini nila ang sitwasyon sang yara sa vulnerable sector kaangay sang mga Senior Citizen kag Person with Disabilities kun sa diin suno sa iya gamay manlang nga paghulag sa ila nga baligyaanay.
Nahibaluan nga ang ‘Benteng Bigas Meron Na’ program sang gobyerno ang mahimo lang nga ma-avail sang Senior Citizen, Person with Disabilities, Solo Parent kag Minimum wage earners.
Samtang, wala pa naman sang pahayag kun san-o mahimo nga ma-avail sang mga pumuluyo sang probinsya sang Capiz ang nasambit nga programa.
Nagpalab-ot naman sang mensahe si Cambe nga ang programa makabig isa ka grasya para sa pila naton ka mga kauturan diri sa probinsya para mapahagan-hagan man ang ila nga budget kag sa bahin naman nila nga mga manugbaligya sang bugas, nagpahanumdom ini sa iya nga mga kaupdanan nga ipalin ang pagtuman sa kun ano ang ginpatuman sang gobyerno may kaangtanan sa presyo sang pagbaligyaanay sang bugas.
With a report from Bombo Francis Binas
