ROXAS CITY – Naga-ululukay nga salas sang ila puloy-an ang naabtan sang isa ka negosyante sang ini ang nagpauli alas-10:30 sa gab-i sang Hunyo 7, sa New Road, Barangay Banica, syudad sang Roxas.
Ginkilala ang tag-iya sang balay nga si Josephine Gregore, 31-anyos, kasado, negosyante kag residente sang nasambit nga lugar.
Suno diri, natalupangdan sini nga bukas na ang pertahan sa ila nga kusina, kag sa iya pagtsekyar, nagalalapta na ang ila kagamitan sa salas.
Natukiban man nga ginbringka sang kawatan ang pertahan sang ila master’s bedroom kag natigayon nga mataban ang P6,000 nga kuwarta kag nanari-sari nga alahas nga nagabalor sa kapin P100K.
Ginapahayag nga nag-agi ang wala makilala nga kawatan sa wala ma-lock nga sliding window sa ila nga kusina.
Sa karon, nagapadayon ang imbestigasyon sang mga kapulisan angut sa nagluntad nga insidente.
