Hugot nga ginpakamalaut sang mga kaalyado sang Ukraine sa nakatundan ang paglunsar sang Russia sang duha ka ballistic missile attacks sa syudad sang Sumy sa Ukraine nga nagpatay sang 34 ka tawo.
Lakip sa mga napatay amo ang 2 ka kabataan kag 117 ka iban pa ang pilason.
Duha ka Russian ballistic missiles ang nag-igo sa sentro sang Sumy sang Domingo sang aga, Abril 13, nga naglupok malapit sa unibersidad sang estado kag sentro sang kongreso, nga nagbilin sang duguon nga mga bangkay nga nagalinapta sa mga dalan.
Gintawag naman ni US Secretary of State Marco Rubio ang pag-atake sang Russia bilang “horrifying” kag nagpalab-ot sang pakig-unong sa mahal sa kabuhi sang mga biktima kag ginsiling nga isa ka tragic reminder ang nasambit nga pag-atake rason nga nagatimakas ang Trump administration para matuldukan na ang giyera.
Samtang, gin-akusahan sang incoming German chancellor nga si Friedrich Merz ang Russia nga nagahimo sang mga krimen sa inaway.
Gin-akusahan man ni France President Emmanuel Macron ang Russia sang hayag nga pagbalewala sa kabuhi sang tawo, international law kag diplomatic efforts ni US President Donald Trump.
Suno sa iya, kinahanglan ang mabaskog nga tikang agud mapatuman ang ceasefire sa Russia, rason nga nagatrabaho na ang France agud malab-ot ini nga katuyuan upod sa mga partner countries.
Ginhimo sang Russia ang pag-atake sa tunga sang mga pagtinguha sang Amerika, ang pinakamabaskog nga kaalyado militar sang Ukraine, nga tapuson ang kinagamu, nga yara na sa ikaapat nga tuig, paagi sa negosasyon sa Russia kag Ukraine sa idalom ni Trump.
