IVISAN, CAPIZ – Dismayado ang bana sang street sweeper nga nalapakan-patay sang truck sa banwa sang Ivisan sa ginpahayag sang abogado sang NKS Marketing nga magahatag lamang ang kompanya sang P50,000 sa mga nahalitan sa aksidente.
Sa interview sang Bombo Radyo kay Ronald Sargento, bana ni Maricel Sargento nga nalapakan-patay sang truck, ginkasubo gid sini ang desisyon sang kompanya sa bulig nga igahatag bangud may apat pa ini nga mga kabataan kag indi ini makaigo ang P50,000 sa ila galastusan sa punerarya nga naglab-ot sa P130,000 kag P5,000 pa lamang ang ila nga gin-down.
Dugang pa sini nga nabudlayan gid ini sa karon bangud nadulaan na ini sang timbang sa kabuhi.
Desidido naman ini nga magpasaka sang kaso sa driver sang truck kag kompanya kun indi magkasugot kag kun indi mahatag sang insakto sang kompanya ang bulig para sa ila.
Suno pa kay Ronald nga sa natabo nga pag-meeting sa ila sang Domingo sa abogado sang kompanya, indi lamang siya ang nadismaya kundi mangin ang tag-iya sang mga salakyan kag mga establishment nga ginpangdalasa sang truck kag mga biktima nga napilasan.
