DAO, CAPIZ- Wala na sang kabuhi sang nasapwan ang isa ka lalaki sa tunga sang uyapad sa Barangay Daplas, Dao, Capiz sang aga sang Hunyo 25.
Ang biktima amo si alyas “Nestor,” 58 anyos kag residente sang nasambit nga lugar.
Sa interview sang Bombo Radyo kay Police Captain Rian Ampoyos, hepe sang Dao Municipal Police Station, ginpahayag nga nakabaton ang ila talatapan sang tawag halin sa residente nga nakakita sang bangkay sa diin gilayon nila nga ginrespondehan kaupod ang Dao Emergency Response Unit sa lugar.
Dugang pa sini, gindala pa ang biktima sa Dao District Hospital apang ginpahayag sang mga doktor nga ini wala na sang kabuhi pag-abot pa lang.
Nahibaluan nga bangud sa ginasupreher nga balatian ang gintunaan sang kamatayon ni alyas “Nestor,” kag nagapati man ang iya pamilya nga wala sang foul nga natabo.
Sa karon, yara na ang bangkay sa isa ka punerarya sa banwa kag natalana nga ipaidalom sa post-mortem examination.
Samtang, nagpanawagan man si Police Captain Ampoyos sa publiko nga indi pagpabay-an ang kaugalingon, labi na kun may ginabatyag nga balatian.
Interviewed by Bombo Francis Biñas
