ROXAS CITY – Ginkakibot sang pila ka pumuluyo sa banwa sang Pilar matapos nasaksihan ang wala nagakaagnas nga bangkay sang anay katapo sang Philippine Marine nga ginlubong 29 ka tuig na ang nakaligad sa Barangay Casanayan, sa nasambit nga banwa.
Ginkilala ang bangkay kay Oscar Gonzales, kag ini ang namatay sang tuig 1993.
Sa interview sang Bombo Radyo kay Jogen Roda Valencia, nagpadulong ini sa Casanayan Public Cemetery bangud madamo sang tawo sa amo nga lugar kag nakiusisa ini.
Apang ginkatingala sini ang nasaksihan kun sa din ang bangkay nga 29 ka tuig na ang nakaligad nga ginlubong ang wala nagakaagnas.
Sa panaysayon ni Valencia, kumpleto pa ang parte sang lawas sang bangkay apisar indi na klaro ang tsura, may buhok pa kag wala man sang may masimhutan nga nagapanimaho.
Suno diri, ginkutkot ang pantyon sang bangkay bangud igalubong kuntani diri ang nagtaliwan sini nga apo.
Nagapati si Valencia nga may yara sang misteryo nga natabo bangud duwa na ini ka beses nga may nakit-an nga wala nagakaagnas nga bangkay sa amo man nga lugar.
