ROXAS CITY – Nakapauli na sa Pilipinas ang bangkay sang Capizeña Overseas Filipino Worker nga napatay sa Saudi Arabia.
Ginkumpirmar sa Bombo Radyo ni Rose Barroa Buhat, pakaisa sang napatay nga OFW nga si Maria Sabina Gipa sang Barangay Bago Grande, Panay nga mismo ang Mayon Manpower Agency ang naggasto para makapauli sa Pilipinas ang bangkay sang Pinay.
Suno kay Barroa, naghulag ang agency matapos nga ginpaandaman ini sang Office of the Undersecretary for Migrant Workers Affairs ukon UMWA nga pasakaan sang kaso kun indi nila pag-iproseso nga madala sa Pilipinas ang bangkay ni Gipa.
Matandaan nga Abril 11 sini nga tuig sang nagpadulong sa Saudi Arabia si Gipa apang wala pa ini madugayan sa luwas sang pungsod, ginbawian ini sang kabuhi sa ospital sang Hunyo 10 bangud nagsuprer sang brain edema.
Apang nagapati ang mga himata sini nga may foul play sa kamatayon sang Pinay bangud ginapahayag nga ginapagutoman ini sang iya amo kag ginamaltrato pa.
Samtang suno kay Buhat nga wala na sang plano ang pamilya sang napatay nga magpasaka pa sang kaso batuk sa employer ukon sa agency sang biktima kag batunon na lamang ang kamatayon sini.
