ROXAS CITY – Nagaguwa sa imbestigasyon sang kapulisan nga bangud nagahuran sa sound system ang hubog nga suspek nalabo sini ang tatlo ka miyembro sang pamilya sang Disyembre 31 sa Sitio Malamig, Barangay Poblacion, Sapian Capiz.
Ini ang ginkumpirmar ni Police Lieutenant Merry Chris dela Cruz, hepe sang Sapian Municipal Police Station sang mainterview sang Bombo Radyo.
Matandaan nag-angkon sang pilas sa magkatuhay nga parte sang lawas ang magpamilya nga sanday alyas ‘Robert’, alyas ‘Gilbert’ kag alyas ‘Sheena’ matapos ginlabo ni alyas ‘Emman’.
Suno diri, yara sa impluwensya sang makahulubog nga ilimnon ang suspek kag posible wala natakuran ang ginapatunog nga sound system sang mga biktima bilang kabahin sa pagsug-alaw sang bag-ong tuig.
Ginpadulongan ni alyas ‘Emman’ ang balay sang biktima kag ginapahayag nagbuya sang malain nga tinaga.
Ginapahayag ginhaboy pa sini sang bato ang balay sang mga biktima rason nga ginguwa ini nanday alyas ‘Robert’ kag alyas ‘Gilbert’.
Apang lipod sa ihibalo sang mag-amay, nga may bitbit nga binangon ang suspek kag madasig nga ginpanglabo ang mga ini.
Nagtambag pa sa inaway ang iloy nga si alyas ‘Sheena’ apang pati ini ang napilasan tuga sang pagpangagat.
Gilayon nga naaresto ang suspek kag nakuha sa paghinakup sini ang binangon nga may kahabaon nga 20 pulgada.
Sa karon, nagapabilin sa Mambusao District Hospital si alyas ‘Gilbert’ bangud sa naangkon sini nga pilas sa dughan kag sag-ang samtang nakaguwa naman sa ospital ang iya mga ginikanan matapos ang pagbulong.
Desidido naman nga magpasaka sang kaso ang pamilya sang biktima kag mapasabat ang suspek sa ginhimo nga pagpanglabo.
