DAYAO ROXAS CITY – Gindangop sa Bombo Radyo sang pila ka mga residente ang palpak nga drainage system nga nagakonekta sa flood control project sa Roxas City.
Ang nasambit nga proyekto amo ang construction of drainage system sa Barangay Dayao nga nagabalor sang P4.9 million kag ang contractor amo ang RCDG Construction Corporation kag may completion date nga Oktubre 31, 2022.
Sa interview sang Bombo Radyo Roxas kay Punong Barangay Wenie Batuampo, iya ginpahayag nga nagatuga sang pagbaha sa ila nga lugar ang barado nga drainage system bangud sa mga basura.
Suno kay Batuampo, ginatinguhaan nila nga mga opisyales nga makapatigayon sang regular nga clean up drive activity agud maakad ang mayor nga mga kanal nga barado.
Dugang pa sang natungdan, matatlo na ka tuig ang nasambit nga proyekto apang pigado ang pag-ubra ilabi na sa mga takop sang manhole.
Pahayag pa Batuampo may mga on going pa nga flood control projects sa ila barangay kag nagalaom ini nga masolusyonan ang ila nga problema nga nagatuga sang perwisyo sa mga residente ilabi na sa mga estudyante nga kinahanglan nga maglusong sa tubig baha kada tag-ulan.
