ROXAS CITY – Wala sang may matabo nga lockdown sa Barangay Poblacion banwa sang Ivisan sa pihak nga may yara sang tatlo ka mga indibidwal nga magpamilya nga nagpositibo sa COVID-19.
Ini ang ginkompirmar ni Ivisan Felipe Neri Yap sang mainterview sang Bombo Radyo.
Ginpahayag ni Yap nga magpamilya ang tatlo ka panibag-o nga kaso nga nagpagkit sa nasambit nga barangay.
Lunsay mga asymptomatic kag wala sang history of travel sa mga lugar nga may yara sang nagpositibo sa nasambit nga balatian apang naka-close contact sa isa ka nurse nga una na nga pagpositibo sa COVID-19.
Suno kay Yap nga manugtapos na ang 14-day quarantine sang tatlo ka mga indibidwal nga nagpositibo sa nasambit nga balatian.
Nahibaluan nga nakasugtanan man sang Covid-19 task force nga indi na pagpaidalom sa “lockdown” ang lugar nga ginaistaran sang tatlo ka mga nagpositibo bangud isa man sila ka balay nga ginapulian kag wala man nakaguwa sa ila nga panimalay.
Dugang pa sini nga antes pa man naguwa ang resulta sang test, ginpaidalom na sa quarantine ang tatlo ka mga indibidwal.
Samtang padayon na ang ginpatigayon nga contact tracing sang mga otoridad sa mga naka-close contact sa tatlo ka nagpositibo sa nasambit nga balatian.
