Nagapanawagan ang Bayan Panay nga ipatuman man sa Western Visayas ang P85 nga pagsaka sang minimum wage agud makabulig sa nagabug-at nga kahimtangan sang mga mamumugon.
Sa interview sang Bombo Radyo kay Elmer Forro, Secretary General sang Bayan Panay, iya ginpahayag nga bisan indi daku ang P85 nga wage increase, daku na ini nga bulig sa mga empleyado agud makapiyan-piyan sa ila pang-adlaw-adlaw nga pagpangabuhi.
Suno kay Forro, bangud sa padayon nga pagsaka sang presyo sang mga balaklon kag serbisyo, naganubo man ang purchasing power sang sweldo sang mga mamumugon, rason nga mas nagabudlay sila sa pagsapat sang kinahanglanon sang ila pamilya.
Dugang pa niya, kinahanglan nga padayon nga tun-an ang dugang nga wage increase agud makasabay ang kita sang mga trabahador sa nagataas nga cost of living.
Nahibaluan nga magapatigayon ang Regional Tripartite Wages and Productivity Board (RTWPB) sa Western Visayas sang wage conference sa Hulyo 21, kun sa diin paga-istoryahanan ang mga panawagan kag mga suhestyon may kaangtanan sa posible nga pagtaas sang minimum wage sa rehiyon.
