ROXAS CITY – Ginpatpat sang Office of the Senior Citizen Affairs (OSCA) sa Roxas City ang mga benepisyo para sa mga katigulangan.
Sa interview sang Bombo Radyo kay Mr. Eddie Dela Cruz, Head sang Office of the Senior Citizen Affairs sa Roxas City — ginpahayag sini nga may yara sang P10,000 nga financial incentives para sa mga senior citizen nga naga-edad 80 tubtob 95 anyos.
Samtang, para sa mga magaabot sa edad nga 100 anyos, may mas daku nga benepisyo — P100,000 nga cash halin sa national government kag dugang nga P50,000 gikan mismo sa City Government sang Roxas. Ini nga kantidad igahatag sa selebrasyon sang ila ika-100 nga kaadlawan.
Apang, ginpahanumdom man ni Dela Cruz ang publiko nga may pila ka proseso nga dapat sundon.
Isa ka bulan antes mag-edad sang 80 anyos, kinahanglan na nga magpasa sang mga dokumento, upod na ang Senior Citizen ID, PhilHealth ID, kag isa ka 2×2 ukon whole body nga litrato, nga ipasa sa OSCA office.
Ginpaathag pa gid ni Dela Cruz nga bukas ang ila opisina para sa mga senior citizen nga may mga reklamo ukon nagakinahanglan sang bulig.
With a report from Bombo Francis Biñas
