Ginasiguro sang West Visayas State University (WVSU) nga mga best students kag best faculty members ang ginabaton sang unibersidad nga amo ang kabangdanan sang masami nga pagpangibabaw sa mga pasinawan.
Sang damlag lang, 36 ka mga graduates sang WVSU ang nakasulod sa Top 10 sang Nursing Licensure Exam (NLE) 2025 sa diin kabug-osan nga 122 examinees ang nakapasar.
Samtang, sa bag-o lang nga ginpaguwa nga Licensure Exam for Professional Teachers 2025, top performing school man ang West Visayas State University sa elementary level kag secondary level.
Sa interview sang Bombo Radyo kay Dr. Joselito Villaruz, Presidente sang West Visayas State University, iya ginpahayag nga ginalauman na niya nga mangibabaw ang unibersidad sa pasinawan bangud amo sini ang masami nga nagakatabo.
Apang suno sa iya, double win ang natabo subong bangud dungan nga nag-Rank 1 ang WVSU sa elementary kag secondary.
Pahayag niya, tuman ka dalom kag puno sang pagpanikasog ang paghanas sang mga estudyante samtang yara sa unibersidad sa diin ginahanda na ang mga ini para sa ila future workplaces nga mangin outstanding professional.
Ginganyat man ni Dr. Villaruz ang mga senior high school students nga mag-eskwela sa West Visayas State University sa diin extended ang online application period sang WVSU Admission Examination sa Disyembre 31, 2025.
