ROXAS CITY – Nangin masaku na karon ang Roxas City fire station sa pagpalab-ot sang fire safety tips sa publiko kasunod sa pag-obserbar sang Semana Santa sa masunod nga semana.
Ginpahayag ni FO1 Don Anthony Falcis, tagpamababa sang Roxas City fire station nga nagapanagtag sila sang flyers sa mga terminal, pahugpaan, merkado, simbahan, plaza kag iban nga pampubliko nga lugar agud mapalab-ot sa mga pumuluyo ang mga tips sa paglikaw sa sunog.
Magluwas sa mga leaflets, nagapatigayon man sang rekorida ang mga personnel sang BFP bilang kabahin sang information dissemination sang talatapan.
Suno kay Falcis nga target sang talatapan ang zero fire incident karon nga semana santa.
Samtang pila sa mga fire safety tips nga ginpalab-ot ni Falcis sa publiko amo ang pagkakas sa mga saksakan ukon pag-unplug sa mga appliances nga wala na ginagamit, pagpatay sa baga sa mga dalapugan kalakip sa mga LPG antes magbiya sa ila mga balay kag likawan ang pagsindi sang kandila labi na kun wala sang nagabantay agud malikawan ang sunog.
