ROXAS CITY – Ginaturn-over sang pamunuan sang Bureau of Fire Protection ang ila makompiskar nga mga gasolina sa ila ginakasa nga mga operasyon sa Roxas City Motorpool sa Barangay Dinginan, Roxas City.
Ini ang ginpahayag sang Deputy City Fire Marshall kag Chief Arson Investigator sang Roxas City Fire Station nga si Senior Fire Officer 2 Marlon Garbo sang mainterview sang Bombo Radyo.
Ginpahayag ni Garbo nga ila nga ginarekord sa logbook ang mga narekober nga tiningi nga gasolina kag gina-isip man ini antes itugyan sa pamunuan sang Roxas City Motorpool.
Suno kay Garbo, ang ila lamang nga trabaho amo ang pagpatuman sang ordinansa nga nagadumili sa pagpabligya sang tiningi nga gasolina kag gilayon ini nga ginaturn-over sa amo nga lugar.
Gintadlong ni Garbo nga wala sang kamatuoran nga ginakonsumo mismo sang mga taga-BFP para sa ila tagsa ka mga salakyan ang marekober nga mga gasolina bangud wala na sila sang hurisdiksiyon nga magtugda pa sa pag-dispose sa amo nga mga gasolina.
Natumod suno kay Garbo ang Roxas City Motorpool nga mangin lugar para sa marekober nga mga gasolina kag iban pa nga flammable materials bangud malayo ini sa mga pamalay.
Nagalaum naman ang pamunuan sang BFP nga paboran sang konseho sang siyudad ang ila ginaapelar nga paghatag sang ngipon kag himuon nga mas komprehensibo ang ordinansa agud mapapas ang mga ilegalista nga nagabaligya sang tiningi nga gasolina.
Mahibaluan nga sa kabug-usan suno kay Garbo, nagalab-ot na sa kapin 3, 000 litros sang gasolina ang ila narekober sa ila mga operasyon humalin sang gin-implementar ang nasambit nga ordinansa.
