ROXAS CITY, CAPIZ- Ginpakigbahin sang Roxas City Jail-Bureau of Jail Management and Penology (BJMP) ang mga programa kag kadalag-an sang ila nga talatapan hanungod sa mga Persons Deprived of Librety (PDL).
Sa interview sang Bombo Radyo kanday JSupt. Julius Cesar Chavez, Jail Warden kag JO3 Glen Arinque, BJMP Male Dorm & Human Rights Officer, ila ginpahayag nga sa karon, on-going ang pag-eskwela sang mga PDL sa ila nga nasakpan. Sa diin ano (6) diri ang nagaeskwela sa elementary level, 25 sa Junior High School, 45 sa Senior High School kag isa ang maga-eskwela sa karon sa college level.
Pamaagi sa bulig sang mga parter agencies kag stakeholders sa diin nagapanguna ang TESDA ukon Technical Education and Skills Development, nahatagan sang kahigayunan ang mga inmates nga maka-eskwela kag mahasa sa tagsa ka mga patag nga ila sini gusto.
Pila sa mga aktibidad sang TESDA amo ang magpatigayon sang training nga tuman gid nga nabenepisyohan sang mga PDL sang Roxas City Jail sa diin nga ginahatagan ini sila sang ihibalo sa pag-ubra sang mga handicrafts, pag-welding, pagluto kag pila pa ka mga skills training nga amo ang nangin pamaagi nila nga magka-income.
Samtang, magluwas sa skills training nga ginapakigbahin sang TESDA, ginahatagan man sini ang mga PDL sang National Certificate II pagkatapos sang training.
Magluwas sa mga educational program, may yara man sang sa Mental Health kag Wellness programs, Spiritual Program, Livelihood Program, kag iban pa nga tuman man nga nabenepisyuhan sang mga PDLs agud nga sa ila pagguha, preparado na sila sa bag-o nga pamaagi sang pagpangabuhi.
Pahayag pa nanday JSupt. Chavez, Jail kag JO3 Arinque, ang mga programa ang indi lamang sa pagsilot kundi isa man ka kahigayunan sa mga PDL nga magbag-o kag mangin produktibo nga myembro sang sosyudad sa ila nga pagguha.
Padayon nga nagalaom ang ahensya nga pamaagi sa mga nasambit nga inisyatibo, mas madamo nga PDL ang makaangkon sang kahigayunan nga mag-umpisa liwat kag makaamot sang kaayuhan sa pungsod.
Ang BJMP nagapti nga pamaagi sa insakto nga paghanas, edukasyon, kag suporta, ang tagsa ka mga PDL ang may kahigayunan nga magbag-o ang kabuhi kag mangin isa ka maayo nga tawo para sa ila nga pamilya kag komunidad.
Interviewed by Bombo Francis Biñas & Bombo Sunnie Mae Batencila
